घुससहित विमानस्थल भन्सार कार्यालयका ३ कर्मचारी पक्राउ

काठमाडौं । अख्तियार दुरुपयोग अनुसन्धान आयोगले कुरियरमार्फत सामान पठाउँदा सेवाग्राहीसँग घुस माग गर्ने तीन जना कर्मचारीलाई नियन्त्रणमा लिएको छ।

त्रिभुवन अन्तर्राष्ट्रिय विमानस्थलको भन्सार कार्यालयस्थित वैदेशिक हुलाक भन्सार शाखामा कार्यरत कर्मचारी घुससहित पक्राउ गरेको हो ।

पक्राउ पर्नेमा हुलाक भन्सार शाखा भन्सार अधिकृत इन्द्र न्यौपाने, कार्यालय सहयोगी गणेश प्रसाद पुडासैनी र हुलाक भन्सार पार्सल (निकासी) शाखामा कार्यरत नासु छवि प्रसाद रिजाल छन् ।

उनीहरुलाई अख्तियार दुरुपयोग अनुसन्धान आयोगको टोलीले गोश्वारा हुलाक कार्यालय डिल्लीबजारबाट आइतबार पक्राउ गरेको हो ।

आयोगले स्रोत नखुलेको दुई लाख ६८ हजार २८८ नगद बरामद गरेको जानकारी दिएको छ। उनीहरूका साथबाट विभिन्न व्यक्तिका २३ थान मोबाइल सेटसमेत नियन्त्रणमा लिइएको छ।