टोखामा ट्रकबाट बरामद २५ करोड १९ लाख रुपैयाँ बराबरको डलर र युरो कसको ?

केहि वर्ष (५ वर्षअघि) ७ किलो अवैध सुन तस्करीको आरोपमा पक्राउ परी २०७८ पुसमा नख्खु कारागारबाट कैदमुक्त भएका कुसाङ लामा यो घटनामा पक्राउ परेका एक मात्रै व्यक्ति हुन् । प्रहरीका अनुसार यस अघिको घटनामा उनीसहित चार जना पक्राउ परेका थिए । त्यतिबेला पनि उनी भरियाका रुपमा जोडिएको अनुसन्धानबाट देखिए पनि त्यो सुनको मालिक को हुन् भन्ने खुलेको थिएन ।

प्रहरीले यतिका धेरै युरो र डलर नेपाली बजारबाटै संकलन गरेर जम्मा गरिएको हो कि भारतबाट पनि ल्याइएको हो भन्ने कोणबाट अनुसन्धान अघि बढाएको छ । केहि सूचनाको विश्लेषणबाट यति धेरै विदेशी मुद्रा सुन किन्नकै लागि लैजान लागिएको निष्कर्ष नजिक प्रहरी पुगेको छ ।

प्रहरीका अनुसार युरो र डलर काठमाडौंमा जम्मा गरिएको हो भने कहाँ र कसरी जम्मा भयो र यसमा कोको संलग्न छन् भन्ने प्रश्न उब्जिएको छ । ‘भारतबाट पो यतिका धेरै विदेशी मुद्रा ल्याइएको हो कि वा भारतीय व्यापारीलाई अवैध सुन बेचेर हात परेको रकम हो भन्ने कोणबाट पनि अनुसन्धान थालिएको छ,’ अनुसन्धानमा संलग्न एक अधिकारीले भने ।

२५ करोड रुपैयाँभन्दा बढीको युरो र डलर ट्रकबाट बरामद भएको हो । सो ट्रक झन्डै २० दिनसम्म स्वयम्भूतिरको ग्यारेजमा राखिएको र त्यहीँ फल्स बटम बनाएर रंगरोगन गरिएको सूचना प्रहरीले प्राप्त गरेको छ ।

लामाले भने प्रहरीसँगको प्रारम्भिक बयानमा आफूले थानकोटमा ट्रक लिएको र व्यापारीहरुले भनेअनुसार कपडा लिनका लागि रसुवागढी जान लागेको बताएका छन् । प्रहरीले पक्राउ गरेको ट्रक लामाको आमाको नाममा देखिए छ ।

एक अनुसन्धान अधिकारीले भने  ‘लामाको पृष्ठभूमि, आर्थिक अवस्था र उनको सम्पर्कको जालो केलाउने काम भइरहेको छ’ ।