चेकिङको क्रममा मान्छे कुट्ने प्रहरी अधिकारी निलम्बीत

काठमाडौं– सडक चेकिङको क्रममा सर्वसाधारणमाथि कुटपिट गर्ने प्रहरी अधिकारी निलम्बनमा परेका छन् । निलम्बन हुनेमा असई बुद्धिबहादुर भुजेल रहेका छन् । उनी चितवनको गणेशधाम प्रहरी बिटमा कार्यरत थिए ।

गत पुस १५ गतेको घटना रहेको जिल्ला प्रहरी कार्यालय चितवनले जनाएको छ । भरतपुर महानगरपालिका–११ खोले गुम्बानजिकै बाइपास रोडमा यो घटना भएको प्रहरीले जनाएको छ ।

यतिबेला सामाजिक सञ्जालमा दुई पाङ्ग्रे सवारी रोकेर चेकजाँच गर्दा चालकले फोन गर्न खोजेपछि प्रहरीले ‘पावर देखाएको ?’ भन्दै निर्घात कुटपिट गरेको भिडियो भाइरल बनेको थियो । उक्त भिडियो भाइरल भएपछि प्रहरीले डीएसपी ज्ञानकुमार महतोको नेतृत्वमा छानबिन समिति पनि गठन गरेको थियो ।