पाँचथरमा पहिरोमा परेर आमा, छोरीको मृत्यु

काठमाडौं । पाँचथरको फिदिम नगरपालिका ४ चिसापानीमा पहिरोले घर पुर्दा आमा, छोरीको ज्यान गएको छ ।

मृत्यु हुनेहरूमा फिदिम १२ घर भइ हाल फिदिम ४ मा अस्थायी बसोबास गर्ने २४ वर्षीया सपना शेर्पा र उनकी ५ वर्षीया छोरी डोल्मा शेर्पा रहेको प्रहरीले जनाएको छ ।

दुवैजनालाई आज बिहान ४ बजे पहिरोले पुरेको थियो। पहिरो गएको स्थानदेखि केही टाढा डेरा बस्ने उनीहरू साथीको घरमा सुत्न आएका थिए।

पहिरोले आदिवासी जनजाति महासंघ पाँचथरको भवन पनि पुरेको छ। सोही भवन नजिकैको घर सडक माथिदेखि आएको पहिरोले पुर्दा आमा छोरीको ज्यान गएको हो।

दुवै जनाको शव निकालिएको जिल्ला प्रहरी कार्यालय पाँचथरका प्रहरी प्रमुख डिएसपी हेमन्त भण्डारीले जनाएका छन् ।