काभ्रेमा पहिरोले पुरिएर दुईको मृत्यु, पाँच वेपत्ता

काठमाडौं । काभ्रेमा पहिरोले पुरिएर दुई जनाको मृत्यु भएको छ । काभ्रेको तेमाल गाउँपालिका–७ का भिम बहादुर तामाङको घर पहिरोले पुरिँदा ५० वर्षीया पातली तामाङ र ४० वर्षीया नक्कली तामाङको मृत्यु भएको प्रहरीले जनाएको छ ।

काभ्रेपलाञ्चोकका पनौती नगरपालिका-११ थुम्कीमा पहिरोले घर लग्दा पाँचजना सम्पर्कविहीन भएका छन्। स्थानीय अर्जुन भण्डारीको घर पुरिँदा उनी र श्रीमतीसहित पाँचजना बेपत्ता भएका हुन्।

निरन्तर ठूलो वर्षा भइरहेको र ठाउँठाउँमा पहिरो गएका कारण प्रहरी तथा उद्धारकर्मीलाई त्यहाँ पुग्न कठिनाइ भएको छ।

पनौती- ११ कै ख्याकु भन्ने स्थानमा पनि पहिरोले घर भत्किँदा पशुचौपाया मरेको जनाएको छ। गर्द खोला र साङ खोला पनि पहिरोका कारण थुनिएको प्रहरीले जनाएको छ ।