नेविसंघबाट उदाएका बाजुराबाट निर्वाचित सांसद पाण्डे बने पर्यटन मन्त्री

नेपाली कांग्रेसका सहमहामन्त्री समेत रहेका पाण्डे विकट जिल्ला बाजुराबाट निर्वाचित सांसद हुन् । यसअघि पाण्डेले संविधानसभा सदस्य र राष्ट्रिय सभा सदस्यका रुपमा समेत काम गरिसकेका पाण्डे तेस्रोपटक संसदमा प्रतिनिधित्व गरिरहेका छन् ।

कांग्रेसका सहमहामन्त्री रहेका पाण्डे ३ पटक सांसद भइसकेपनि अहिलेसम्म मन्त्री बन्न सकेका थिएनन् ।  यतिबेला पाण्डे मन्त्री बन्ने अपेक्षा धेरैको थियो । राष्ट्रिय राजनीतिमा प्रभाव राख्ने नेताका रूपमा पाण्डे परिचीत छन् । बाजुराको आसा अनि भरोसाको केन्द्र मानिने पाण्डेले आफु काम गर्ने ठाउँमा नपुगेको गुनासो गर्दै आएका थिए । अब भने उनका लागि काम गरेर घाम झै छर्लङ्ग पार्ने अवसर जुरेको छ । उसो त  पाण्डेले पार्टीभित्र मन्त्री नबनाइएकोमा कहिल्यै सार्वजनिक रुपमा गुनासो गर्नेमा पर्दैनन् ।

निष्ठाको राजनीति गर्ने पाण्डेलाई यतिबेला भने न्याय गरेको भन्दै  उनका समर्थकहरुले बधाई दिईरहेका छन् । यो अवसरलाई सहि सदुपयोग गर्नुपर्ने सुझाव समेत दिईरहेका छन् । पाण्डेको काँधमा यसले थप जिम्मेवारी बोध गराउने देखिन्छ । पार्टीले जनतामा राम्रो छाप छाड्न पनि पाण्डेजस्ता निष्ठावान नेतालाई यसपटक सरकारमा पठाउनुपर्ने धेरैको माग थियो ।

बाजुरा जिल्ला कम्युनिष्ट पार्टीको गढ नै थियो । पाण्डेलाई कांग्रेसले उम्मेदवार बनाउँदा जित्ने आशा कमैले गरेको बाजुराका कांग्रेस नेताहरुनै बताउँछन् । बलियो उम्मेदवार कर्ण बहादुर थापालाई भारी मतले पराजित गर्दै पाण्डे बिजयी भएका थिए । पाण्डेको  सादगी शैली र सैद्धान्तिक, वैचारिक प्रष्टताका कारण बाजुराका जनताले एक पटक बिश्वास गरेर निर्वाचित गराएका हुन् ।

नेविसंघको राजनीतिबाट उदाएका पाण्डे पार्टीको केन्द्रीय सदस्य, पार्टीको सहमहामन्त्री हुँदै नागरिकक उड्डयन तथा पर्यटन मन्त्री बन्न सफल भएका छन् ।

पिछडिएको क्षेत्रको पनि प्रतिनिधित्व हुने र सरकारमा रहेर काम पनि गरेर देखाउनसक्ने निष्कलंकित छवि पनि भएकाले पाण्डे यसपटक मन्त्री बन्ने चर्चा भैरहेको थियो । यसबीच  कांग्रेसले कम्युनिष्ट गढ भत्काएर उदाएका निष्ठावान् नेतालाई मन्त्री बनाएर न्याय गरेको भन्दै अहिले उनलाई बधाई दिनेको ओइरो नै लागेको छ ।