बाजुराका ५ सय बढी भूमिहीनलाई निस्सा वितरण गरियो

बाजुरा : बाजुराका ५ सय बढी भूमिहीनलाई निस्सा वितरण गरिएको छ। यो संगै २ हजार बढीको लगत संकलन गरेको राष्ट्रिय भूमि आयोग जिल्ला समिति बाजुराले जनाएको छ। राष्ट्रिय भूमि आयोग जिल्ला समिति बाजुराको कार्यालय श्रोतका अनुसार ११ महिनामा ५ सयबढिलाई निस्सा वितरण गरिएको हो । यस बर्षको फागुन मसान्तसम्म जिल्लाभरका ५ सय ३९ परिवारलाई निस्सा वितरण गरिएको कार्यालयले जनाएको छ।

शुक्रबार सदरमुकाम मार्तडीमा पत्रकार सम्मेलनको आयोजना गरी राष्ट्रिय भूमि आयोग बाजुराले हालसम्म सम्पादन गरेका क्रियाकलाप तथा गतिविधिका साथैं सो तथ्यांक सार्वजनिक गरेको छ । यस बर्षको हालसम्म जिल्लाका ९ वटै स्थानिय तहका भूमिहीन दलित, भूमिहीन सुकुम्वासी र अव्यवस्थित बसोबासी गरेर ५ सय ३९ परिवारलाई निस्सा वितरण गरिएको राष्ट्रिय भूमि आयोग बाजुरा अध्यक्ष जनक रोकायाले बताएका छन् ।

त्यस्तै जिल्लाभरका २ हजार ७ सय ५२ भूमिहीन दलित, भूमिहीन सुकुम्वासी र अव्यवस्थित बसोबासीहरुको लगत संकलन गरिएको छ । जिल्लाका ९ वटै पालिकाका भूमिहीन दलित, भूमिहीन सुकुम्वासी र अव्यवस्थित बसोबासीहरुको लगत संकलन गरिएका मध्ये हालसम्म ९ सय ३१ जनाको लगत प्रविष्ट गरिएको बताइएको छ।