पैसा नहुँदा घर फर्किन पाएनन् मिटरब्याज पीडित

काठमाडौँ :  २३ दिन हिँडेर काठमाडौंमा पुगेर आन्दोलनरत मिटरब्याज पीडितमध्ये कम्तीमा दुई सय जनालाई घर फर्किन सकेका छैनन् । उनिहरु संग पैसा नभएपछि घर फर्किन समस्या भएको हो । मिटरब्याज तथा ठगीविरुद्ध किसान मजदुर संघर्ष समितिका अनुसार, प्रदर्शनरत ७ सय जना पीडितमध्ये आधाभन्दा बढी फर्किसकेका छन् ।तर, कम्तीमा दुई सय जनालाई घर फर्किन भाडा तिर्ने पैसा समेत नभएपछि भृकुटीमण्डपमै रहेको संघर्ष समितिका प्रवक्ता निर्ग नवीनले जानकारी दिएका छन् ।

सरकारले सोमबार राति सिंहदरबारमा मिटरब्याज पीडितसँग चार बुँदे सहमति गरेको थियो । सहमति अनुसार, नयाँ जाँचबुझ आयोग बन्नेछ, त्यसले अवैध रुपमा तयार गरिएका तमसुकहरु खारेज गर्न सिफारिस समेत गर्ने उल्लेख गरिएको छ । तर, सहमति भइसकेपछि पनि दुई सय जना अझै भृकुटीमण्डपमै छन् । ‘साँझसम्ममा व्यवस्थापन हुन्छ होला, अहिलेलाई पैसा म्यानेज भएकाहरु जति फर्किनुभयो’, निर्गले  भने, ‘अरुलाई व्यवस्थापन गर्न प्रयास गरिरहेका छौं ।’ केही दिनअघि जिल्ला र नगरस्तरबाट आएका अगुवाहरु घर फर्किएका थिए ।

उनीहरुले धान बेचेर ल्याएको पैसाले कतिपय गाउँ फर्किएको अभियन्ताहरु बताउँछन् । पूर्वी तराई घर भएकाहरु अधिकांश फर्किइसकेका छन् । तर, पश्चिमतिर भाडा पनि बढी पर्ने भएकाले उनिहरुलाई घर फर्किन समस्या भएको हो । उनका अनुसार, अभियन्ताहरुले अहिले बाँकी रहेकाहरुको विवरण संकलन गरिरहेका छन् । आफूहरुको समस्या समाधान नभएको भन्दै १६ माघमा पूर्वमा काँकडभिट्टाबाट अवधेश कुशवाह र पश्चिममा निर्ग नवीनको नेतृत्वमा मिटरब्याज पीडितहरु पैदल हिँडेर काठमाडौं आएका थिए ।