लघुवित्तका ऋणीहरू संसद भवन परिसरमा छिरेकोबारे छानबिन समिति गठन

काठमाडौं । नयाँ बानेश्वरस्थित संसद् भवनमा लघुवित्तका ऋणीहरू प्रवेश गरेको घटनाबारे उपत्यका प्रहरी कार्यालयले छानबिन गर्ने भएको छ । घटनाबारे छानबिन गर्न प्रहरी वरिष्ठ उपरीक्षक दिनेशराज मैनालीको नेतृत्वमा समिति गठन गरिएको हो ।

लघुवित्त ऋणीहरू निषेधित क्षेत्र तोडेर संसद भवन परिसरमा छिरेको विषयमा अध्ययन गर्न तीन सदस्यीय छानबिन समिति गठन गरिएको छ ।

संसद भवनको सुरक्षा व्यवस्थाबारे चिन्ता व्यक्त गर्दै सभामुख देवराज घिमिरेले आईजीपी वसन्त कुँवरलाई फोन गरेका थिए । कुँवरले छानबिन समिति गठन भएको बारे जानकारी दिएका थिए  । संसद भवन सुरक्षार्थ खटाइएको टोलीसमेत परिवर्तन गरिएको कुँवरले सभामुखलाई बताएका छन् ।

प्रहरी हेडक्वार्टरले एसएसपी दिनेशराज मैनालीको नेतृत्वमा एसपी नवराज अधिकारी र डीएसपी दिनेश घिमिरे सम्मिलित छानबिन समिति गठन गरेको हो ।