आर्थिक अभावले अस्पतालको बेडमा छटपटाउदै अछामका क्यान्सर पीडित शाही

मिन बहादुर खड्का काठमाडौं : अछामको पञ्चदेवल नगरपालिका वडा न . ५ लैटीका क्यान्सर पीडित प्रेम शाही अहिले उपचार अभावमा छटपटाईरहेका छन् ।विगत तीन महिना यता काठमाडौंको भक्तपुर क्यान्सर अस्पतालमा उपचारको अभावमा छट्पटाइरहेका हुन् ।

शाहीले आर्थिक अभावकै कारण उपचार गर्न नपाँउदा अहिले अस्पतालको बेडबाटै सहयोगको हारगुहार गरिरहेका छन् । अन्दाजी ५० वर्षका शाही भारतमा ज्याला मजदुरी गरेर परिवार पाल्दै आएका थिए। शाहीको दिन गुजारा गर्ने माध्यम नै भारतको ज्याला मजदुरी थियो ।

भारतमा ज्याला मजदुरी गरेर परिवार पाल्दै आएका शाही स्वास्थ्यमा समस्या देखिएपछि घर फर्किए । घर फर्किएपछि उनको स्वास्थ्य अवस्था झन जटिल बन्दै गयो । त्यसपछि उपचारका लागी स्वास्थ्य सस्था सम्म पुगे । गाउँमा उपचार सम्भव नभएपछि लगत्तै शाहीलाई गत असारमा उपचारका लागि आफन्तले चितवन क्यान्सर अस्पतालमा ल्याँए । त्यहाँ पुर्याइसकेपछि उनलाई जाँच गर्दा क्यान्सर पुष्टि भएको उनका आफन्त भतिज नाता पर्ने सुरत शाहीले बताएका छन् । त्यसपछि शाही बिचमा घर समेत गएका थिए।

चितवन क्यान्सर अस्पतालमा झण्डै उनलाई ४ महिना सम्म राखिएको थियो । त्यसपछि त्यहाँबाट दुई महिना अगाडी भक्तपुर क्यान्सर अस्पताल  रिफर गरिएको थियोे । अहिले उनलाई भक्तपुर क्यान्सर अस्पतालमा उपचार गर्दै आएको पनि झण्डै तीन महिना पुग्न थालेको छ ।

क्यान्सर पीडित शाहीले भन्छन् “पैसा छैन, परिवारको बिचल्ली छ, म मृत्यु संग लडिरहेको छु, पैसा भएपछि बाँच्छु की भन्ने आस छ, सबैले सहयोग गर्दिनुहोला, तपाइँहरुको सानो सहयोगको मलाई खाँचो छ छोराछोरी कसरी पाल्ने भएका सबै पैसा यतै खर्च भैसके”

बिहान बेलुका छाक तार्नै मुस्किल छ घरमा, न घर खर्च चलाउन समेत पैसा छैन उपचार त टाढाको कुरा हो, भारत गएर ज्याला मजदुरी गरेर परिवार पाल्ने मान्छे हु,शाहीले थपे ” शाहीका चार वर्षका एक छोरा छन् उनका दुई वटी श्रीमतीबाट तीन छोरी छन् ।

आर्थिक अभावकै कारणले  उपचारमा समस्या भएको बिरामीमा आफन्त सुरत शाहीले बताएका छन् । उनले भने, “परिवारको अवस्था पनि नाजुक छ, उपचार गर्दा गर्दा पाँच लाख बढी खर्च भैसकेको छ, अहिले दैनिक ४/५ हजार खर्च भैइरहेको छ, अहिले सहयोग संकलन गरिरहेका छौँ, कहाँबाट व्यवस्था गर्ने, समस्या भयो,पैसाको व्यवस्था भएको भए उहाँ बाच्नु हुन्थ्यो” आर्थिक अभावकै कारण उपचारनपाई अस्पताल शैयामा छटपटाइरहेका शाही जीवन र मरणको दोसाँधमा छन् ।

उनी अहिले मृत्यु संग लडिरहेका छन् । आर्थिक अभावकै कारण जीवन मरणको दोसाँधमा रहेका शाहीले आफ्नो उपचारका लागी अस्पतालको शैयाबाटै हारगुहार गरिरहेका छन् । यता उनका आफन्तहरुले पनि सहयोग संकलन गरिरहेका छन् । उनिहरुले विभिन्न सहयोगी निकाय सामाजिक अभियान्ता लगायतलाई भेटेर समस्या सुनाउनुका साथै उपचारका लागि हारगुहार गरिरहेका छन् ।

अहिले उनको उपचारमा पाँच लाख जति खर्च भैसकेको र दैनिक ४/५ हजार खर्च अहिले भैरहेको बिरामीका आफन्त जनक बुढाले बताए। उनका अनुसार एकिन अहिले नै अस्पतालले यति लाग्छ भनेर नभनेपनि झन्डै २० लाख बढी खर्च लाग्न सक्ने अनुमान छ । अहिले सहयोग अभियान नै सञ्चालन गरेर उपचार खर्च संकलन गरिरहेको उनको भनाई छ । सहयोग गर्न चाहानेहरुले आफ्न्तको सम्पर्क नम्बर ९८०३६८३६६८, र ९८४७२९६८९६ मा सम्पर्क गरि सक्दो सहयोगका लागि समेत आफन्तले अपिल गरेका छन् ।