ओमानको १७४ रन सिंगापुरलाई १७५ रनको लक्ष्य

काठमाडौं । आइसिसी टी–२० विश्वकप एसिया फाइनल क्षेत्र छनोटमा ओमानले सिंगापुरलाई १ सय ७५ रनको लक्ष्य दिएको छ । कीर्तिपुरस्थित त्रिवि मैदानमा टस हारेर ब्याटिङको निम्तो पाएको ओमानले निर्धारित २० ओभरमा ६ विकेट गुमाएर १ सय ७४ रन बनायो ।

उसका लागि अकिब इलियासले उत्कृष्ट पारी खेले । ३५ बलको सामना गरेका उनले ४ चौका र ४ छक्कासहित ६३ रन बनाए । टी–२० मा इलियासको यो छैटौँ अर्धशतक हो । यस्तै, प्रतीक आठवलेले ४२, कप्तान जीशान मक्सूदले २६ र कश्यप प्रजापतिले १२ रन जोडे । सिंगापुरका लागि अनिश परम, जनक प्रकाश र रमेश कालिमुथुले दुई/दुई विकेट लिए ।

ओमान लगातार दोस्रो जितको खोजीमा छ । उसले पहिलो खेलमा मलेसियालाई ३२ रनले हराएको थियो । सिंगापुर भने पहिलो जित निकाल्न चाहन्छ । ऊ पहिलो खेलमा नेपालसँग ८ विकेटले पराजित भएको थियो । आज हुने समूह ‘ए’ को अर्को खेलमा नेपाल र मलेसिया प्रतिस्पर्धा गर्नेछन् । नेपाल र मलेसियाबीचको खेल दिउँसो साढे १ बजेदेखि कीर्तिपुरस्थित त्रिवि मैदानमा सुरु हुनेछ ।